杜汶澤主持嘅網上節目《喱騷》粗口橫飛得嚟又集集精彩，淨係睇佢隔離嘅澤女郎已經夠哂睇頭。
最近一集主題《結婚定單身》，當然要擺埋自己上枱。話說佢2005年娶田蕊妮，當年喺洲際酒店擺酒50圍，仲要用名車接新娘，請天王做兄弟。不過呀澤坦言以當年搵錢能力，幾百萬當年對佢嚟講都只不過係濕濕碎。
直到當年加入英皇，遇到呢個女人，「攞咗佢成副身家」⋯⋯
呀澤口中攞咗佢副身家嘅女人就係英皇娛樂嘅金牌經理人，Mani 霍汶希。
話說呀澤以前不嬲都係自己賺到幾多就洗幾多，但簽咗英皇之後，Mani就同田蕊妮講：「以後杜生啲錢就直接入落你戶口，咁之後你就出返糧比佢。」
呀澤諗起當年即時嬲到飛起，爆哂粗咁話：「X你XX，你個霍汶希同埋田蕊妮呀，呢兩個女人夾X埋，就攞咗我副身家。」最好笑係佢自爆每個月只獲發萬五蚊生活費，仲低過入息中位數，又難怪佢嬲到咁！
